ضياء محمد

 

السلام عليكم ورحمة الله وبركاته

أولا، شرف ليا وجودي معاكوا واتمنى تجربتي تفيدكم …

قصتي على مواقع الفريلانسر بدأت بموقع Upwork . وكان سعيي فقط ورا اني ازاي اجيب دولارات وبالفعل ابتديت ادور على شغلانات كتير وابعت لحد مافي حد مصري قبل اني اعمله 20 مقالة ب 20$ ودي كانت اول شغلانة ليا بعد محاولات كتيير ..وكان في دماغي ان المصري ممكن يعمل hire لمصري زيه وقد كان ..

بعدها حسيت اني مش حابب جو المقالات ده خالص ومش مبسوط بيه وحاسس اني مش مستمتع وانا شغال ..ودي مقالة مهمة جدا خلتني استفاد منها كتير من احمد مسعد. كانت بتتكلم عن حاجات كتير اهمها انك لازم تكون حابب مجالك وعارف اصلا انت عايز تعمل ايه ..وده فعلا اللى خلاني اسعى ورا مجالات كتير ..ابتديت اتعلم html عشان اعمل موقع وابقى مبرمج ..حبيت اسلوب استاذ اسامة في التعليم جدا .وخلصت فعلا كورس الhtml بس حسيت اني مش مرتاح اني اكمل وكنت بمل بسرعة ..لحد ماربنا كرم ودخلت في تعلم المونتاج وحسيت اني مش بمل ودي كانت خطوة اني اتعلم اكتر ..ودخلت على عميل كان عايز حفلة جواز ولما قريت فهمت غلط وكنت فاكر ان الحفلة دي لي وكان عايز يمنتجها فدخلتله وقولتله ان هعمل الشغل ده ببلاش مقابل ان اي شغل جاي تعيني في وعشان تشوف شغلي ..ووافق وبعتلي شغل بسيط وطلع هو شركته اصلا متعلقة بالفوتوجرافر وكانت دي البداية وبتعامل معاه لحد دلوقتي ..

العيوب اللي واجهتني هي الطمع والغباء .

وهو اني حسيت ان المبلغ قليل بيجيلي بسبب العمولة الضخمة اللى بياخدها اب ورك ..فطلبت منه يبعت مباشرة على payoneer وراح الاكونت بعد ماعملت فيه اول شغلانتين عشان المخالفة دي ..فسيبت اب ورك خالص وروحت لموقع fiverr حطيت برومو بسيطة لكوليكشن افلام اجنبي انا عملته مع شوية موسيقى ..وجالي دعوة من واحد تركي وطلب مني امنتج فيديو بسيط ..والموقع ده الغريب فيه ان ابتدى يجي عليه شغل كتير ودعوات كتير بدون ماروح لأي حد او ابعت لأي حد ..

وبرضو من كتر كلام الناس عن اب ورك وانه مميز وانا مقتنع انه فعلا مميز والعملاء اللى فيه منظمين وبيقدروا تعب الواحد عملت اكونت جديد على اب ورك وربطه بالبنك الوهمي الاميركي بتاع payoneer وحطيت في portfolio بتاعتي كل حاجة عملتها على فايفر ..واتفاجئت اني واخد rising talent على الموقع .

وكمان العميل بتاع الفوتجرافر طلب مني شغل تاني وعملتهوله على الميل الجديد ..والدنيا ماشية الحمد لله ..

بالتوفيق للجميع ..واتمنى مكونش طولت عليكم

وشكرا جدا لأحمد مسعد على الموقع المحترم ده ..واتمنى نكون اسرة واحدة ونفيد بعض وننجح كلناا