ابراهيم محمد

انا اسمي ابراهيم محمد، عندي 17 سنه. الاول انا مبرمج C#،HTML،CSS،JS،PAWN،LUA بقالي اكثر من 5 سنين تقريبا بس بدات اني اشتغل كفري لانسر من سنه و شهر تقريبا. في البدايه كانت المسألة كلها صعبه اوي اني اجيب شغل و مكنتش عارف انا ليه مش بتقبل في شغل و كنت في الوقت ده محتاج فلوس لمشاريع انا شغال عليها. فبدات اني اهتم بالبروفايل بتاعي و بدات اني احط شوية حاجات من شغلي و اكتب تفاصيل عن نفسي على قد ما اقدر، لحد ما فعلا لقيت ان حد قبلني.

ساعتها كان الشخص ده بالصدفه حد مسلم و برضو كان بيعمل حاجه خيريه و لما عرف اني مسلم قرر انه يقبلني و يخليني اساعده في الشغل ده، وفعلا الحمد لله بعديها بشهر خلصته و اخدت ريفيو 5/5 و اخدت كمان فلوس كويسة. بس ده مكانش كفايه بالنسبالي، انا كنت عايز شغل اكثر و كنت عايز شغل اكبر، فا قررت اني اقدم في شغل حجمه اكبر شويه بس انا كنت خايف من اني معرفش اعمله مع ان كانت خبرتي اكبر من الشغل المطلوب بكثير. فا أول لما قدمت بساعتين او 3 الشخص ده كلمني و قالي لو انا فهمت كل حاجه هو كتبها، و فعلا اكدتله اني اقدر اعمل الهو عايزه و بدانا الشغل، المفروض الشغل ده كان مدته 3 ايام و كان ب 250$،ساعتها انا خلصت الشغل ده في حوالي 8 ساعات بس و ده كانت حاجه مفرحه بالنسباله و بالنسبالي اكثر لان كان بالنسبالي انجاز كبير جدا، بعد ما خلصت الشغل و شافه ، قفل المشروع ده و اداني 5/5 برضو، بس الحلو في الحكايه دي انه اداني مكافئه زياده بنفس مقدار المشروع ده، فبصراحه انا مكنتش مصدق نفسي ساعتها و حسيت بفرحه كبيره اوي.

مع ان خبرتي كفريلانسر كانت صفر بس انا فعلا عرفت اني ابدع في المجال ده و اني اوصل للقمه فيه، بعد الحصل ده كان بيجيلي شغل كثير و كنت برفض برضو شغل كثير بسبب الدراسه و مشروعاتي الاساسيه الانا دخلت الفريلانس علشانها.

انا فضلت 8 شهور بحاول اني اخد اي شغل مهما كان كويس او وحش، لو كنت فقدت الامل بسرعه مكانش زماني عندي شغل زي ده، فده بالنسبالي انجاز كبير، انا انصح اي حد داخل مجال الشغل الحر انه ميياسش بسرعه و انه يفضل ورا حلمه و اهدافه لحد ما يوصلها.

انا حاليا وصلت لاكثر من 30 ريفيو ، كلهم الحمد لله 5/5 و انا ناوي اخلي البروفايل بتاعي يفضل كده.