مصطفى صابر

أهلا، أنا مصطفى صابر، بشتغل freelancer على موقع Upwork ومجال شغلي هو الbackend web development.

حابب قبل ما أتكلم عن الfreelancing (العمل الحر) أقولكم قصتي من البدايه سريعا، خلينا نبدأ من ثانوي. أنا كنت طالب بيذاكر وبيجتهد علشان كان كل اللى حواليا بيذاكروا، ودخلت الامتحانات وجيبت مجموع عالى 98%،وكان الطبيعي انى ادخل كلية الهندسه طبعا.

فدخلت هندسه عين شمس وكنت فاكر انى خلاص دخلت جنة العلم والتكنولجي وهاتعلم ازاى اعمل سفن فضائيه وافهم النسبيه لاينشتين. فا لما دخلت هندسه لقيت ان افضل قسم ليا هو قسم كمبيوتر، فدخلته على امل انى هاتخرج منه واشتغل فى جوجل.

لكن الحقيقة طلعت مختلفه عن كل توقعاتي وملقتش فى الكلية اكتر من تضيع وقتي ومجهودي فى اللاشئ. ومابتعلمش اللى المفروض لما اتخرج اشتغله او حتى بتساعدني كنظام تعليمي انى احقق اللى بحلم بيه، فعلشان كده قررت انى انساها طول السنه الا وقت الامتحانات افتكرها شوية (وده لان وجودي فى الكلية حاميني من دخول الجيش)، وقررت اركز على إني أعلم نفسي لأني خلاص اقتنعت ان ماحدش هايعلمني حاجة. ولو سيبت نفسي مع التيار هابقى بنتحر بمعنى الكلمة.

فا كنت مبعملش حاجة فى حياتي غير إني أتفرج على كورسات فى مختلف مجالات الكمبيوتر وأعمل الحجات اللى بحبها.

لحد ماعرفت الfreelancing وعرفت إنك ممكن تشتغل من بيتك او اى مكان ومش هاتبقى مجرد موظف فى شركة أو مصنع مديره بيستعبدك وفى الاخر يديله ملاليم. لأ، أنت هتشتغل فى أى حاجة أنت بتحبها ومع أى حد بمزاجك وفى أى وقت. وأنت اللى بتحدد مجهودك يقدر بكام. الموضوع كنت شايفه خيالي اوى وخاصه الأسعار. إزاى مجهودي اللى من صغري كان ملوش لازمه وكان ممكن يطلع عيني فى بروجيكت فى الكلية اسبوع وفى الاخر اخد 10 درجات، ولما اعمل نفس المجهود اخد دولارات!

فبدأت اعرف اكتر عن الfreelancing واتفرج على فيديوهات واقرى مقالات. لحد مافعلا الموضوع سحرني، وابتديت نظرتي تتغير تماما للعالم. أنا مش عايز حياتي تبقى موظف فى شركة حتى لو كانت جوجل، أنا عايز ابقى مدير نفسي، مدير شركتي. أنا هاشتغل freelancer وهابنى نفسي فى كل حاجة هاطور مهاراتي الtechnical والnon-technical لحد يوما ما ان شاء الله مش هاكون شغال عند Elon Musk او mark zuckerberg ،انا هابقى عندي شركتي اللى تنافسهم.

فا دلوقتي فعلاً بقى عندي هدف واضح أقدر اشتغل عليه، وقررت إنى هاتعلم مجال الويب واشتغل فيه. والأهم إن الكلام ده يحصل فى اقرب وقت ممكن، علشان خلاص أنا ضيعت وقت كتير جدا ومش هاينفع اضيع وقت تاني.

فا بقيت مش بعمل أى حاجة فى حياتي غير إنى اتفرج على كورسات وأطبق اللى بشوفه. اتفرجت على مئات الساعات من الكورسات لمختلف الناس وفى مختلف مجالات الweb. (كورسات web design،frontend ،backend).

كنت بسرع الكورسات ببرنامج VLC واشوفها على 2x و3x علشان اخلص بسرعه. وماكنش قدامي غير انى لازم احقق الهدف اللى حطيته لنفسي.

والحمد لله فى خلال 4 شهور تقريبا، كنت اتعلمت حاجات كتير في مجال الweb، ولقيت ان تخصص الbackend اكثر متعه ليا. فا قررت إنى هركز فيه اكتر.

طبعا بجانب الكتب والمقالات والفيديوهات الnon-technical اللى بتتكلم ازاى ممكن تسوق نفسك ومهاراتك وتكلم وتقنع العميل يختارك. عشان أتميز عن المنافسين.

وعملت اكونت على Upwork وشغال بقالي 40 يوم والحمد لله استلمت حوالي 500 دولار كبداية.

وأنا مؤمن إن لو كان حد قالي إنى أول ماشتغل هاخد المبلغ ده كنت هاقول عليه بيتريق عليا!

أنا هفضل مكمل وهاتعلم اكتر وهاشتغل اكتر لحد ماحقق اللى بحلم بيه ان شاء الله.

وآخر كلمه عايز اقولها هي إنك تخلي حياتك متقسمه ل3 أجزاء:
1. اشتغل حاجة تجبلك فلوس
2. تطوع فى حاجة ليها معنى فى المجتمع
3. اشتغل على إنك تعمل حاجة تخلد اسمك فى البشرية.

طبعا لازم اشكر مسعد وداني والناس الجميلة اللي بتساعد أي حد بكل معلومة تعرفها بدون مقابل، دول اقرب للملائكه بجد،ربنا يكرمهم.

وإن شاء الله هانزل موضوع تاني مفصل على الفيسبوك عن الكورسات اللى اخدتها والحجات الكويسه فى المجال اللى هتفيد أي حد عايز يتعلم web من وجه نظري البسيطه جداا ،وشكرا.